Enrique Bunbury regresará a Galicia o 10 de decembro de 2026 para actuar no Coliseum da Coruña, dentro da súa nova xira internacional “Nuevas Mutaciones Tour 2026”, coa que percorrerá América e España acompañado por unha banda de dez músicos.
A xira só terá catro datas no Estado —Madrid, Valencia, A Coruña e Zaragoza— polo que o concerto no Coliseum será unha das poucas oportunidades de ver o novo directo do artista.
As entradas xa están dispoñibles en enriquebunbury.com e ticketmaster.com.
Un novo disco e unha nova etapa creativa
A xira chega tras a publicación de “De un siglo anterior”, o seu novo álbum, editado o 17 de abril. O disco foi gravado no Desierto de los Leones (México) e producido polo propio Bunbury xunto a Ramón Gacías. O traballo explora ritmos e sonoridades latinoamericanas en diálogo con estilos contemporáneos, nun proceso que comezou en 2025 e se pechou coa masterización de Tom Baker en Los Ángeles.
O álbum inclúe dez cancións marcadas pola sensibilidade interpretativa e unha procura artística centrada na emoción. Como explica o propio Bunbury:
“Queríamos crear algo que só puidese existir a través da sensibilidade dos músicos e da vulnerabilidade da voz”.
Un directo con banda ampliada e repertorio renovado
No seu novo espectáculo, Bunbury revisitará parte do seu amplo repertorio acompañado por unha formación de luxo: Robert Castellanos, Ana Belén Estaje, Ramón Gacías, Javier García-Vega, Luismi Huracán, Jordi Mena, José Miguel Pérez Sagaste, Jorge “Rebe” Rebenaque e Álvaro Suite.
Unha figura clave do rock en español
Con máis de tres décadas de carreira, Bunbury é unha das voces máis influentes da música iberoamericana. Desde Héroes del Silencio ata a súa etapa en solitario, destacou pola innovación, a fusión de xéneros e unha profunda identidade lírica.
Recoñecido con premios como o Latin Grammy ao Mellor Álbum de Rock, o Premio Ruido, o Ojo Crítico, ou o Lifetime Achievement Award dos Latin Grammy, o artista continúa ampliando o seu legado con novos proxectos e unha constante vontade de evolución.
About The Author
Jose Turvegal