Noia xa está lista para converterse, un ano máis, na capital galega da arpa. A 13ª edición do Noia Harp Fest arranca este mércores 29 de xullo e prolongarase ata o sábado 1 de agosto cunha programación que mestura tradición, innovación e nomes de referencia internacional. Serán dez concertos, nove deles gratuítos, que viaxan desde a música antiga ao jazz, pasando pola electrónica ou a canción de autor.
Un arranque de luxo coa Real Filharmonía de Galicia
A inauguración terá lugar no Teatro Coliseo Noela coa Real Filharmonía de Galicia, dirixida por César Marcos, e o arpista José Antonio Domené como solista. O momento máis esperado será a estrea mundial de Alén do azul, obra do compositor coruñés Teo Montero Rey, gañadora do Premio Portus Apostoli 2025. Este é o único concerto de pago do festival, con entradas dispoñibles en ataquilla.com.
O talento novo toma o escenario
O xoves 30 pola mañá, o Liceo de Noia acollerá o V Encontro de Escolas e Alumnado de Arpa de Galicia, onde 22 estudantes de entre 8 e 18 anos ofrecerán un concerto conxunto dirixido pola escocesa Maeve Gilchrist.
Pola noite, o Coliseo Noela vivirá unha sesión dobre: primeiro, Gilchrist presentará a súa particular fusión de folclore, jazz e técnicas percusivas; despois, chegará unha proposta exclusiva do festival, o encontro entre Beatriz Martínez e a artista sonora Acacia Ojea, nunha experiencia que mestura raíz, performance e electrónica.
Venres de arpa histórica, canción de autora e jazz
O venres 31 comezará na Igrexa de Santa María A Nova coa arpista irlandesa Siobhán Armstrong, especialista en arpa gaélica antiga encordada en metal.
Xa pola tarde, o Coliseo Noela acollerá dúas actuacións:
- A Banda do NHF xunto a Su Garrido Pombo, con arranxos creados por Rodrigo Romaní.
- O trío do estadounidense Park Stickney, mestre da arpa electroacústica, que ofrecerá unha viaxe polo jazz contemporáneo.
Un peche con sabor patrimonial e unha estrela internacional
O sábado 1 de agosto será unha xornada dedicada á recuperación histórica e á creación contemporánea. Na Igrexa de San Francisco, Manuel Vilas e Entrebescant interpretarán música medieval con réplicas dos instrumentos esculpidos no século XV na Arquivolta de San Martiño de Noia. No Claustro de San Francisco, Neleta Ortiz e Thomas Piel presentarán en exclusiva unha obra inédita de Enrico Mainardi para arpa e chelo.
E para despedir o festival, a Praza do Tapal recibirá a Sona Jobarteh, primeira muller solista de kora dunha liñaxe de griots. A artista gambiano-británica pechará o NHF cun directo poderoso que mestura afropop, tradición mandinga e compromiso cultural.
Programación completa do Noia Harp Fest
29.07, Teatro Coliseo Noela | Real Filharmonía de Galicia e José Antonio Domené. Estrea de ‘Alén do azul’, gañadora do Premio Portus Apostoli 2025 *
30.07, Liceo de Noia | V Encontro de Escolas e Alumnado de Arpa de Galicia
30.07, Teatro Coliseo Noela | Maeve Gilchrist
30.07, Teatro Coliseo Noela | Beatriz Martínez e Acacia Ojea *
31.07, Igrexa de Santa María A Nova | Siobhán Armstrong
31.07, Teatro Coliseo Noela | Banda do NHF con Su Garrido Pombo *
31.07, Teatro Coliseo Noela | Park Stickney: Gustaf, Frederick & Isabel Trio
01.08, Igrexa de San Francisco | Manuel Vilas e Entrebescant
01.08, Claustro de San Francisco | Neleta Ortiz *
01.08, Praza do Tapal | Sona Jobarteh
- Inclúen estreas absolutas