O Underfest Xacobeo suma unha nova e poderosa incorporación ao cartel da súa 9ª edición: Maria Arnal actuará o 31 de outubro na Sala Capitol (Santiago), nunha única data en Galicia, para presentar o seu novo e impactante espectáculo “AMA”.
Considerada unha das artistas máis innovadoras do panorama estatal, Arnal combina electrónica, avantpop e polifonía tradicional cunha posta en escena que mestura voz, danza e intelixencia artificial. O resultado é un directo hipnótico que está deixando abraiados a público e crítica en cada parada da súa xira.
Unha traxectoria chea de premios e proxectos rompedores
Ao longo da súa carreira, Maria Arnal acumulou recoñecementos como o Ojo Crítico de RTVE, varios Premios MIN, o Premio Ruido, ou o Premio Gaudí pola súa música para cinema. Tamén destacou en festivais internacionais como o Sónar, onde protagonizou un dos concertos máis comentados da última edición.
Como compositora, traballou en proxectos que exploran a experimentación vocal e a IA, ademais de crear bandas sonoras para filmes como Polvo Serán ou La Virgen Roja, ambas recoñecidas en premios como os Feroz ou os Goya. A súa colaboración co coreógrafo Marcos Morau tamén deu lugar a pezas de danza de gran impacto artístico.
“AMA”: un espectáculo que expande os límites da canción
“AMA” é o primeiro capítulo do seu novo universo creativo: 15 cancións inéditas, polifonía tradicional, voces sintéticas xeradas a partir da súa propia voz e unha posta en escena onde cinco bailarinas modulan o son a través do movemento. Un proxecto desenvolvido xunto ao Intelligent Instrument Lab de Islandia e o Barcelona Supercomputing Center.
Con mirada feminista e crítica, “AMA” coloca o corpo como memoria e resistencia, e a voz como ponte entre o humano e o tecnolóxico. Un regreso contundente aos escenarios e o adianto do seu primeiro disco en solitario.
About The Author
