Depedro volve a Compostela por partida doble. O proxecto de Jairo Zavala actuará na Sala Capitol os días 15 e 16 de xaneiro de 2027, dúas datas nas que presentará o seu novo disco e repasará os temas máis queridos da súa carreira.
Zavala, unha das voces máis persoais da escena estatal, leva desde 2008 construíndo un universo musical propio, mesturando influencias de Latinoamérica, África, o Mediterráneo ou Estados Unidos. Co seu son íntimo e viaxeiro, percorreu medio mundo con xiras por Europa, América, Asia e Oceanía.
Este novo álbum supón outro paso na súa evolución, mantendo a súa esencia pero explorando novos matices. E será enriba do escenario —onde Depedro sempre brilla pola emoción e a proximidade— onde estas cancións collan vida propia.
A súa curiosidade artística tamén o levou a proxectos como o documental Casamance ou Fanantenana, en colaboración coa ONG Agua de Coco en Madagascar, reforzando esa visión da música como ponte entre culturas.
As dúas noites na Capitol prometen ser unha oportunidade única para gozar do seu novo traballo e reencontrarse cun artista que sempre deixa pegada.
As entradas xa están dispoñibles en artmusicagency.es.
About The Author
