LODE presenta Caritaangel

O ARTISTA GALEGO QUE ARRASA NAS REDES SOCIAIS

N.P. – Un dos grandes fenómenos virais en redes, Lode, está de estrea co seu novo tema “Carita de Ángel”. Esta combinación de afrobeat e pop urbano sae coa idea de se converter nun dos grandes temas do verán. Tras acumular máis dun millón de reproducións nas súas cancións, o de Narón cántalle ás relacións tóxicas e aditivas, no que é o seu primeiro tema dende 2023. Con esa dualidade entre anxo e demo, o artista galego xoga con esa idealización que se ten dunha persoa ao principio e que despois acaba por defraudar.

Este novo tema está composto polo propio Lode xunto a Nuria Azzouzi, Mateo Bruquetas, Manuel Sánchez e Javier Millan. A nivel de produción, Lode rodeouse de dous enormes produtores, Baghira e Mees Bickle, que traballan da man de artistas de corte internacional da talla de Beret, Arkano ou Maka, e que ostentan nominacións e premios como Los40 Music Awards ou Discos de Ouro polas súas producións. A localización elexida para levar a cabo a gravación foi o coñecido Estudio 808 de Sevilla. O propio artista destaca a facilidade coa que saíu o tema no proceso de creación, dado que todas as persoas involucradas viviron algo similar e puideron sentirse identificados dende o primeiro momento.

Lode abre así a porta ao seu novo traballo neste 2024. Despois do éxito en 2023 de temas como “Las Ganas” ou “ENAMORAO”, que acumulan máis de medio millón de reproducións en plataformas dixitais, o de Narón ven para revolucionar o verán e poñer a bailar a todo o mundo.

MÁIS DE LODE

Lode é un dos artistas galegos con maior repercusión nas redes sociais. Cun estilo urbano pero multidisciplinar, o cantante de Narón está abraiando ao seu público pola gran combinación nas súas composicións de sons actuais e bailables cunha gran voz. Tras as súas exitosas aparicións en programas televisivos como La Voz ou El Hormiguero, Lode eleva a escena urbana a base de talento, con composicións musicais e coreográficas propias de primeiro nivel.

As súas redes sociais son unha pequena mostra da repercusión do cantante e bailarín galego, acumulando máis de millón e medio de seguidores de todas as partes do mundo nelas, destacando os máis de 35 millóns de visualizacións que acumula na súa canle de YouTube. O seu talento non pasou desapercibido dentro da industria musical, sendo apoiado por grandes figuras do panorama internacional e nacional como Juanes ou Álex Ubago.

Actualmente, o cantante, bailarín e compositor está preparando novos traballos discográficos, así como un novo directo no que deixar patente o seu carácter multidisciplinar, sendo quen de combinar a súa capacidade vocal co seu talento coreográfico. Lode levará o seu éxito nas redes aos escenarios.

About The Author

Solirock

See author's posts