O Coliseum da Coruña acollerá o vindeiro 19 de setembro o regreso a Galicia de Silvio Rodríguez, unha das voces máis influentes da canción iberoamericana e figura esencial da Nueva Trova. A súa visita forma parte da xira coa que o cantautor cubano volverá aos escenarios españois en 2026, un percorrido por grandes recintos que tamén pasará por Barcelona, Zaragoza, Bilbao, Valencia, Sevilla, Murcia e Madrid.
As entradas para a súa única data en Galicia estan a venda a través de silviorodriguez.es e ataquilla.com.
Un regreso cun peso cultural e emocional único
A nova xira de Silvio Rodríguez foi recibida como algo máis que unha simple volta aos escenarios. No seu caso, cada concerto activa unha memoria colectiva que atravesa xeracións: a de quen medrou coas súas cancións, a de quen as descubriu máis tarde e a de quen segue atopando nelas unha maneira de pensar, sentir e mirar o mundo.
O vínculo do artista co público español mantense vivo desde hai décadas, sustentado nunha obra que nunca perdeu vixencia nin profundidade. Con 59 anos de carreira, Silvio continúa dialogando co presente a través dun cancioneiro no que conviven novas composicións e temas que forman parte da memoria sentimental de millóns de persoas.
Un repertorio que forma parte da vida de varias xeracións
Clásicos como Ojalá, Unicornio, La maza, Óleo de mujer con sombrero, Playa Girón ou Te doy una canción son hoxe parte da banda sonora íntima e colectiva de públicos moi diversos. Cancións onde conviven a beleza, a reflexión, a contradición e unha escrita que segue interpelando o presente.
Para moitos espectadores, o concerto da Coruña será unha oportunidade de reencontro cun repertorio que acompañou etapas vitais; para outros, a ocasión de escoitar en directo unha obra recibida por herdanza, descubrimento ou simple permanencia cultural.
Unha noite única no Coliseum
A única data galega da xira permitirá reunir nun mesmo escenario o peso dunha traxectoria fundamental e o presente creativo dun artista que continúa facendo da canción un espazo de pensamento, beleza e escoita.
Silvio Rodríguez chegará acompañado por unha formación integrada por algúns dos seus colaboradores habituais: Niurka González, Malva Rodríguez, Rachid López, Maykel Elizarde, Jorge Reyes, Emilio Vega, Jorge Aragón e Oliver Valdés. Xuntos darán forma a un repertorio no que convivirán temas novos e cancións imprescindibles da súa carreira.
About The Author
Jose Turvegal