O Grove xa ten banda sonora para este outubro. A 63ª Festa do Marisco, que se celebrará do 1 ao 12 de outubro, volverá contar cun dos seus grandes reclamos: os Concertos do Marisco, un ciclo de acceso gratuíto que este ano reúne 17 propostas e que combina figuras internacionais, artistas estatais en plena actualidade, voces fundamentais da música galega e proxectos vencellados á vila.
O cartel está encabezado por Ocean Colour Scene, Dorian, Carlos Sadness e Sés, nunha edición que percorre máis de tres décadas de música e que aposta por unha convivencia natural entre estilos, xeracións e linguaxes.
Un percorrido musical que une escenas e xeracións
A programación deste 2026 traza unha viaxe que vai do britpop dos noventa á música urbana en galego, pasando polo pop electrónico, o rock de raíz, a tradición e as sesións de DJs. Un ciclo pensado para públicos diversos e para achegar ao Grove algúns dos proxectos que están a marcar a actualidade musical deste ano.
Programación día a día
Xoves 1 de outubro – Os Firrás
A formación do Grove abrirá o ciclo cun repertorio de música popular e cancións ligadas á memoria colectiva.
Venres 2 – 9Louro + DJOW
O rapeiro de Muros presentará Amorrer, o seu segundo disco, unha viaxe emocional a través do trap, a electrónica e os ritmos bailables.
Sábado 3 – Ocean Colour Scene + Nanein DJ
Primeiro gran encontro internacional. A banda de Birmingham celebra o 30º aniversario de Moseley Shoals, un dos discos esenciais do britpop.
Domingo 4 – Sés + Cinco en Zocas
Protagonismo galego absoluto. Sés presentará Nadando na incerteza e Cinco en Zocas levarán ao escenario a tradición pandeireteira do Grove.
Luns 5 – @ de Viño
Proxecto local cunha proposta que mestura música popular e novas sensibilidades.
Martes 6 – David Chiquillo e Lote
Dúas formacións vencelladas á vila que continúan renovando a escena local.
Mércores 7 – A Banda do Sequío
Mestura de música popular, rock, versións e retranca. Un clásico da programación.
Xoves 8 – Caballito
Peche do bloque dedicado ás formacións do Grove.
Venres 9 – Sanguijuelas del Guadiana + Fla-Meco
Unha das bandas revelación do ano. Revolá valeulles os premios a Mellor Novo Artista da Academia da Música de España e Mellor Artista Emerxente nos MIN.
Sábado 10 – Carlos Sadness + Manu TF DJ
O músico catalán traerá ao Grove o seu universo de pop luminoso e melodías tropicais, nunha xornada marcada pola nostalxia dos primeiros festivais.
Domingo 11 – Dorian + Freshkiños
A banda barcelonesa presentará Futuros imposibles, un dos discos máis persoais da súa carreira, sen esquecer os himnos que a converteron nunha referencia do pop electrónico estatal.
Un ciclo gratuíto que reforza a identidade cultural do Grove
Os Concertos do Marisco, organizados polo Concello do Grove e coa dirección artística de i-radia Crea, contan coa colaboración de Mahou e consolidan o seu papel como parte central da experiencia cultural, gastronómica e turística da Festa do Marisco. Tras reunir preto de 40.000 persoas en 2025, o ciclo regresa cun cartel que combina nomes recoñecibles, artistas en plena actualidade e unha presenza destacada da música galega e local.
eledarkmidnight